عيوبى

مسكت ورقة اكتب عيوبى فيها ماكفتش
سنين كتير جريت من عمرى وماحستش
كام تجربة عدت واتكررت وماتعلمتش
لا فيا خير ولا قادر على الشر
وتايه لا شايف بحر ولا طايل بر
بعد سنين سالت نفسى انا عبد ولا حر
كان نفسى ابقى نبى لسببين
1-ضميرى من الذنوب مايتأنبش
2-واضمن اى مكان فى الجنة وماتعذبش
اذا كانت رحمة ربنا مكتوبة للمحسنين
طيب مسلم البطاقة
اللى لا عنده عزم ولا سعة ولا طاقة
ولا قدم للجنة جمل ولا حتى ديل ناقة
رحمة ربنا وسعت كل شى بس لا تجوز لينا
احنا بننصر ابليس واليهود ولا فكرنا فى نبينا
وبنقدس الرقاصين وبنتريق على الاحرار واهلينا
حب النبى كلام ولا فعل
واللى هايطردهم من على حوضه بنى ادمين ولا حزمة فجل
هاتعيش على الارض خليفة لربنا ولا هاتتعلف زى العجل ؟
جربت تكتب عيوبك ؟
جربت تعدهم ؟
طيب انت عايش ليه ؟

**
رازى